Ika-anim na Estasyon: PINASAN NI HESUS ANG KRUS

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Juan (19:16-17)
16 Kaya't ibinigay sa kanila ni Pilato si Jesus upang siya'y maipako sa krus. Kinuha nga nila si Jesus. 17 Inilabas siyang pasan ang kanyang krus papunta sa lugar na kung tawagi'y Lugar ng Bungo, Golgotha sa wikang Hebreo.

†Pagninilay
Masdan natin si Hesus, ang Hari ng mundo, na buong pusong tinanggap ang krus na ipinapasan sa Kanya ng mga lapastangan. Ang Kanyang tanging pinanghahawakan ay pag-ibig na nagtulak sa Kanya upang pasanin ang Kanyang krus. Siya ang tunay na Hari, masdan natin siya!
Sa ating mundo, ang kinikilalang hari ay ang mga makapangyarihan, nakaupo sa maringal na trono, balot ng karangyaan, at napapalibutan ng mga aliping handang gawin anumang iutos ng hari. Kabaligtaran kay Hesus, bilang isang Hari, wala siyang maipagmamalaking material na bagay bagama’t sa Kanya ang lahat ng bagay sa daigdig. Wala siyang alipin ngunit Siya pa ang nagturo ng tunay na paglilingkod. Wala siyang maringal na palasyo ngunit niloloob Niyang manirahan sa puso ng mga mababang-loob. Isa siyang maralitang Hari – ang kanlungan ay katarungan, ang lakas ay kababaan ng loob.
Walang anumang reklamo na narinig kay Hesus habang pinapasan Niya ang bigat ng Krus. Ngayo’y tinuturuang Niya tayong tumulad sa kanya na buong pusong tinupad ang Kanyang misyon na magdusa alang-alang sa iba. Hindi tayo dapat manlumo kapag dumarating ang pagsubok sa ating buhay sapagkat iyan ang tanging paraan upang maipakita ang pagsunod kay Hesus. Ito ang mensahe ng Kanyang sinabi: “Buhatin mo ang iyong krus at sumunod sa akin.” (Mt 16:24; Mk 8:34; Lk 9:23)

†Panalangin
Panginoong Hesus, sa Iyong biyaya, tulutan Mo na naisin naming na samahan ka sa Iyong paglalakbay sa daan ng krus. Patawarin Mo kami sa mga pagkakataong tinatakasan namin ang mga pagsubok sa aming buhay. Hayaan mong mapaalalahan kami na Ikaw, bagama’t Diyos ay hindi rin nagging iba sa mga pagdurusang umaalipin sa mundo at Ikaw nga ang unang tumahak sa pagdurusa para sa aming kapakanan.
Ang pagtitiwala sa Iyo nawa ang maging lakas namin sa paglalakbay tungo sa bagong buhay sa piling mo. Hinihiling naming ito sa Iyong masintahing pangalan. Amen.

Ama naming... Aba Ginoong Maria... Luwalhati...
†††

Ikalimang Estasyon: ANG PAGHAGUPIT KAY HESUS

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Juan (19:1-3)
1 Kaya't ipinakuha ni Pilato si Jesus at ipinahagupit. 2 Ang mga kawal ay kumuha ng sangang matinik, ginawa itong korona at ipinutong kay Jesus. Siya rin ay sinuotan nila ng balabal na kulay ube at 3 bawat isa'y lumalapit sa kanya at patuyang bumabati, Mabuhay ang Hari ng mga Judio! At kanilang pinagsasampal si Jesus.

†Pagninilay
Narito ngayon si Hesus, ang inaasahan nang mundong tagapagligtas. Wala siyang kalaban laban sa harap ng mga umiinsulto sa kanyang katauhan at yumuyurak sa kanyang mahal na katawan. Isa siyang hari na ang korona’y tinik ng punong kahoy at sa halip na igalang ay tinutuya ng mga taong nakakakita sa kanya. Mga dampi ng sampal ang naging kabayaran ng mga mga tao sa pagbibigay ni Hesus sa pagdadala Niya ng mensahe ng pag-ibig. Siya ngayon itong hindi iniibig!
Ang mga tao’y nakapiit sa silakbo ng damdamin ng nakararami, nagpadala sila’t nahawa sa sigaw ng marami: “Ipako siya sa Krus”. Sa sandaling ito, ang katarungan ay napasa-kamay ng iilang nagtatamasa ng lumilipas kapangyarihan. Ngunit, silang mga nanakit kay Hesus din ang silang makakadama ng “pagka-yurak sa puso” (Gawa 2: 37) nang nagpahayag si Pedro noong Pentekostes: “Si Hesus ng Nazareth na ibinigay sa inyo ng Diyos... ay ipinako at pinatay ng mga taong walang kinikilalang batas” (Gawa 2:22)
Sa mga taong walang nang Diyos na kinikilala, ang pagkakataon ang siyang magbabalik nito sa kanila.

†Panalangin
Panginoong Hesus, hindi ka karapatdapat na magdusa sa kamay ng taong hindi nakakakilala sa Iyo. Patawarin mo kami, na sa kabila ng aming pakikiisa at pagtanggap sa Iyo sa pamamagitan ng mga sakramento, ay pinipili pa din ang mamuhay laban sa iyong kalooban. Sa sandal ng pagkaalipin sa kasalanan tubusin mo nawa kami at akayin sa landas patungo sa kung saan Ikaw ay aming makakpiling magpasawalang-hanggan. Amen.

Ama naming... Aba Ginoong Maria... Luwalhati...
†††

Ika-apat na Estasyon: SI HESUS SA HARAPAN NI PILATO

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Juan (18:33-40)
33 Si Pilato ay pumasok uli sa palasyo at ipinatawag si Hesus. Ikaw ba ang Hari ng mga Judio? tanong niya.
34 Sumagot si Hesus, Iyan ba'y sarili mong palagay, o may ibang nagsabi sa iyo?
35 Tugon ni Pilato, Hindi ako Judio. Ang mga kababayan mo at ang mga punong pari ang nagdala sa iyo rito. Ano ba ang ginawa mo?
36 Sumagot si Hesus, Ang kaharian ko'y hindi sa daigdig na ito. Kung sa daigdig na ito ang aking kaharian, ipinakipaglaban sana ako ng aking mga tauhan at hindi naipagkanulo sa mga Judio. Ngunit hindi sa daigdig na ito ang aking kaharian!
37 Kung ganoon, isa ka ngang hari? sabi ni Pilato.
Sumagot si Hesus, Ikaw na ang nagsasabing ako'y hari. Ito ang dahilan kung bakit ako ipinanganak at naparito sa daigdig, upang magsalita tungkol sa katotohanan. Nakikinig sa aking tinig ang sinumang nasa katotohanan.
38 Ano ba ang katotohanan? tanong ni Pilato.
Pagkasabi nito, muling lumabas si Pilato at sinabi sa mga Judio, Wala akong makitang kasalanan sa taong ito. 39 Ngunit ayon sa inyong kaugalian, dapat akong magpalaya ng isang bilanggo sa Pista ng Paskwa. Ibig ba ninyong palayain ko ang Hari ng mga Judio?
40 Hindi! sigaw nila. Hindi siya, kundi si Barabbas! Si Barabbas ay isang tulisan.

†Pagninilay
“Paano ko kaya makukuha at mapapanatili ang tiwala ng mga tao sa akin?” Ito ang katanungang kadalasang namamayani sa mga taong naghahangad ng posisyon sa anumang sector ng lipunan o sa ibang salita: “Paano ko kaya mapapanatiling mabango ang aking pangalan?”
Si Pilato, bagama’t kumbinsido na walang kasalanan si Hesus, ay mas piniling pagbigyan ang hiling nga mga tao na ipako si Hesus sa Krus sa isang simpleng dahilan – upang mapanatili ang pagpanig ng mga tao sa kanya at sa kanyang kapangyarihan. Labag man sa katotohanan, mas pinili ni Pilato na pangalagaan ang kanyang sariling interes kahit ito ay magbunga ng kamatayan ng isang isang inosente. Upang mapanatili ang mapag-kunwaring dalisay na interes, nag hugas siya ng kamay sa harapan ng lahat upang ipaalam na wala siyang pananagutan sa anumang kahinatnan ng bugso ng damdamin ng tao laban kay Hesus. Anong uri ng pinuno si Pilato?
Sa kasalukuyan, napakarami pa din ang mga nagpapanggap na pinuno sa ating lipunan, ngunit ang tunay nilang interes ay nakasandal sa pagka-makasarili, kabulaanan at sa sistemang “palakasan”. Sa ganitong uri ngg pamahalaan, talaga ngang hindi mamamayani ang katotohanan. Ano ang mangyayari sa isang bansa na mismong mga pinuno ang nagtuturo na ang pagbabawas ng populasyon sa pamamagitan ng “contraception” ang sagot sa kahirapan? Kailan kaya natin sususpilin ang mga pinunong nagtutulak ng batas na makakapipinsala sa buhay ng inosente? Hanggang kailan natin hahayaan na mamayani muli ang ilusyon ng mga pinuno na sa halip na sila ang mag-dala ng pag-asa sa mga nanganga-ilan, pagpuksa sa buhay pa ang sagot sa kahirapan.
Habang patuloy na namamayani ang mga pinunong tulad ni Pilato na tanging pansariling interes ang pinangangalagaan at sa likod nila’y ang mga taga-suportang bulag sa katotohanan, patuloy na mababayubay sa pagdurusa sa Krus ang ating Panginoon... isang inosenteng naging kabayaran sa kabulaanan at katakawan sa kapangyarihan ng iilan.

†Panalangin
Panginoong Hesus, turuan mo ang aming bayan na magpahalaga sa katotohanan at sa dangal ng buhay. Akayain mo din ang aming mga pinuno sa katuparan ng atas na gawaing kanilang sinumpaan. Nawa’y magsilbi silang larawan ng pag-asa para sa mga aba sa aming lipunan at huwag nilang igiit ang anumang batas na nakasisiil sa mga nakalugmok sa karukhaan.
Hayaan mong isabuhay nila ang dalisay na interes sa paglilingkod at gayundi’y iwasan nawa nilang pagmukahaing tuwid ang mga bagay sa sa katotohana’y baluktot upang mapangalagaan lamang ang mga personal na interes at labis na pagyakap kapangyarihan. Ikaw nawa Hesus ang magsilbing larawan nila ng payak na pamumuhay habang pinaninindigan nila ang kanilang bokasyon sa paglilingkod sa bayan. Hinihiling namin ito, O Hesus, sa Iyong pangalan. Amen.

Ama naming... Aba Ginoong Maria... Luwalhati...
†††

Ikatlong Estasyon: SI HESUS SA HARAP NG SANHEDRIN

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Mateo (26:59-66)
59 Samantala, ang mga punong pari at ang buong Sanhedrin ay naghahanap ng sasaksi laban kay Hesus upang ito'y maipapatay. 60 Kahit na maraming humarap at sumaksi ng kasinungalingan tungkol sa kanya, wala silang matagpuang makakapagpatotoong si Hesus ay dapat mamatay. Sa wakas, may dalawang humarap 61 at nagsabi, "Sinabi ng taong ito na kaya daw niyang gibain ang Templo ng Diyos at muli itong itayo sa loob ng tatlong araw."
62 Tumayo ang pinakapunong pari at sinabi kay Hesus, "Wala ka bang isasagot sa paratang na ito laban sa iyo?" 63 Ngunit hindi umimik si Hesus. Kaya't sinabi sa kanya ng pinakapunong pari, "Iniuutos ko sa iyo sa ngalan ng Diyos na buhay, sabihin mo sa amin kung ikaw nga ang Cristo, ang Anak ng Diyos."
64 Sumagot si Hesus, "Kayo na ang nagsabi. At sinasabi ko pa sa inyo, di na magtatagal at makikita ninyo ang Anak ng Tao na nakaupo sa kanan ng makapangyarihang Diyos at dumarating na nasa alapaap!"
65 Pagkarinig nito, pinunit ng pinakapunong pari ang kanyang damit at sinabi, "Nilapastangan niya ang Diyos! Hindi na natin kailangan ng mga saksi. Narinig ninyo ngayon ang kanyang paglapastangan sa Diyos! 66 Ano ang pasya ninyo?" Sumagot sila, "Dapat siyang mamatay!"

†Pagninilay
Sa kasalukuyan, sinasabing kakaunti na lamang ang mga taong tunay marunong makinig. Sa kabilang dako naman, napakaraming mga tao ang halos wala naman tigil sa pagsa-salita. Halos wala kang marinig kundi ang kanyang boses, tawa, galit, sigaw, bulong, reklamo na para bang siya na lamang ang nararapat magsalita. Minsan, ang walang tigil na pagsasalita ay nagbubunga ng hindi kanais-nais at nakapang-bibiktima pa ng ilan. Si Hesus ay hindi iba sa mga naging biktima ng labis na salita ng iba, minsa’y higit pa sa katotohanan o ang tinatawag na “exaggerations”.
Marahil, nais ng mga bulaang saksi sa mga gawain ni Hesus na maging sikat at mapalapit sa mga punong saserdote kaya’t kahit wala silang nalalaman, siniraan nila si Hesus. Ang sobrang pagsa-salita na na labas sa katotohanan ay tunay ngang nakapagpa-pahamak sa iba. Ang isa pang dimension nito ay tinatawag na “chismis” o ang pagkakalat ng kwentong tungkol sa kapwa na walang katotohanan at batayan. Ilan na kaya sa atin ang naging biktima ng mga maling paratang mula sa iba? Ilan na din kaya ang minsan o madalas na nagiging “exaggerated” at “chismosa o chismoso” naging dahilan din ng pagkapahamak ng iba?
Tandaan natin, sa kasalukuyang panahon kung kalian napakaraming mga tao ang nagdarahop dahil sa iba’t ibang hamon ng buhay, higit na kailangan ng mundo ang mga taong handang makinig sa kapwa.

†Panalangin
Panginoong Hesus, ang iyong pagka-sadlak sa padurusa ay dahil sa mga paratang na walang tatotohanan mula sa mga saksing sinungaling. Huwag mo sanang tulutan na kami din ay makadagdag sa Iyong pasakit dahil sa aming walang habas na pagsasalita ng mga walang katuturang bagay na nakapipinsala sa iba. Sa halip, gamitin mo nawa ang aming tinig upang ang Iyong banal na Salita ay mahayag sa mundo at sa mga taong nangangailangan ng mensahe ng pag-asa at pag-ibig. Hiniling namin ito, sa iyong mapagpalang pangalan. Amen

Ama naming... Aba Ginoong Maria... Luwalhati...
†††

Ikalawang Estasyon: ANG PAGHIHIRAP NI HESUS SA HALAMAN

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Lucas (22:39-44)
39 Gaya ng kanyang kinagawian, umalis si Jesus at nagpunta sa Bundok ng mga Olibo kasama ang mga alagad. 40Pagdating doo'y sinabi niya sa kanila, "Manalangin kayo upang hindi kayo madaig ng tukso."
41 Lumayo siya sa kanila, mga isang pukol ng bato ang layo, at doo'y lumuhod at nanalangin. 42 Sabi niya, "Ama, kung maaari po ay ilayo mo sa akin ang kopang ito, ngunit huwag ang kalooban ko ang masunod, kundi ang kalooban mo." [ 43 Nagpakita sa kanya ang isang anghel mula sa langit at pinalakas ang loob niya. 44 Dala ng matinding hinagpis, siya'y nanalangin nang lalong taimtim, at pumatak sa lupa ang kanyang pawis na parang malalaking patak ng dugo.]

†Pagninilay
Bilang Diyos, malinaw kay Hesus na kailangan niyang ialay ang kanyang sarili alang-alang sa kaligtasan ng mundo. Bagama’t katulad ng ordinaryong tao, napakahirap para kay Hesus na yakapin at harapin ang pinakamabigat na pagsubok sa kanyang buhay. Kaya’t nagmakaawa siya: "Ama, kung maaari po ay ilayo mo sa akin ang kopang ito...”
Sino pa nga ba ang aasahan ng mga nagdurusa sa mga karamdamang hindi magamot ng agham, ng mga taong hinagupit ng mga kalamidad, ng mga taong nawalan ng lahat ng kanilang mga pinagpaguran, at ng mga taong pinanawan ng kanilang minamahal sa buhay?
Si Hesus sa kabila ng takot ay walang kinapitan kundi ang tiwala sa Ama, kaya’t matapos magmakaawa na ilayo sa kanya ang kopa ng paghihirap, agad niyang sinabi: “Ngunit huwag ang kalooban ko ang masunod, kundi ang kalooban mo."
Sa mga sandaling humaharap tayo sa mga pagsubok na para bang mahirap lampasan, matuto tayo kay Hesus. Isabuhay natin ang tiwala sa kalooban ng Ama. Sa sandali na bumibitaw tayo sa pananampalataya at ang tangi nating pinanghahawakan ay ang pagtakas sa pag-subok ng buhay, tumupad tayo sa mungkahi ni Hesus: "Manalangin kayo upang hindi kayo madaig ng tukso."

†Panalangin
Panginoong Hesus, napakaraming pagkakataon na aming iginigiit ang aming sariling mga plano at kagustuhan. Patawarin mo kami sa aming mga pagmamagaling at pagtalikod sa iyong mga paanyaya. Ikaw nawa ang aming maging lakas at tagapag-tanggol sa hagupit ng mga problemang dumarating na para bang hindi naming kayang pagtagumpayan. Maranasan nawa namin ang iyong pagkupkop sa oras ng aming pagharap sa hamon ng buhay. Hinihiling naming ito sa pamamagitan ng iyong mapagkupkop na pangalan. Amen

Ama naming... Aba Ginoong Maria... Luwalhati...
†††

Unang Estasyon: ANG HULING HAPUNAN

P: Sinasamba at Pinupuri ka namin, O Kristo...
B: Sapagkat sa pamamagitan ng Mahal mong Krus ay Iniligtas mo ang Mundo.

†Mula sa Ebanghelyo ni San Lukas (22:17-20)
17 Dumampot siya ng isang kopa, at matapos magpasalamat sa Diyos ay ibinigay iyon sa kanila, at nagsabi, "Kunin ninyo ito at paghati-hatian. 18 Sinasabi ko sa inyo, mula ngayo'y hindi na ako iinom nitong katas ng ubas hangga't hindi dumarating ang kaharian ng Diyos."
19 Dumampot din siya ng tinapay, at matapos magpasalamat sa Diyos ay kanyang pinaghati-hati iyon at ibinigay sa kanila. Sabi niya, "Ito ang aking katawan na inihahandog para sa inyo. Gawin ninyo ito bilang pag-alaala sa akin."20 Gayundin naman, dinampot niya ang kopa pagkatapos maghapunan at sinabi, "Ang kopang ito ang bagong tipan ng Diyos na pinagtibay ng aking dugo. Ang aking dugo ay mabubuhos alang-alang sa inyo.

†Pagninilay
Sa huling hapunan, pinasinayaan ni Hesus ang rurok ng kanyang misyon na iligtas ang tao sa pagkaalipin sa kasalanan. Hindi isang ordinaryong tinapay at alak ang kanyang binigay sa kanyang mga alagad, kundi ang kanyang sariling katawan at dugo ang naging kabayaran sa kasalan ng mundo.
Sa banal na misa, tinutupad ng Simbahang Katoliko ang utos ni Hesus sa huling hapunan: “Gawin ninyo ito sa pag-alaala sa akin.” Ang utos ni Hesus ay hindi lamang ang itaas ang tinapay (na tunay niyang katawan) at ang alak (na tunay niyang dugo). Gayundin, ang lahat ng Kristiyano ay inaanyayahang mag-alay ng sarili para sa kapakanan ng isa’t isa.
Sa panahong laganap ang eksploytasyon o ang pag-abuso sa katawan ng tao upang magkaroon ng huwad na kaligayahan, ipanalangin natin na ang tao ay magkaroon ng pag-galang sa dangal ng katawan ng tao bilang templo ng Espirito Santo.

†Panalangin
Panginoong Hesus, minarapat Mong ialay ang Iyong sarili para sa aming kapakanan. Loobin Mo na kami din ay magkaroon ng kakayahang ingatan ang aming katawan at ang aming buong pagkatao na iyong minamarapat na aming gamitin upang maisagawa ang aming misyon sa lupa.
Ano pa nga ba ang nais mo na ihanda namin sa iyong paninirahan sa aming piling, kundi ang aming malinis na puso at pagkatao?
Inaaalala din namin ang aming mga pari na Iyong inatasang magtaas ng Iyong banal na katawan at dugo sa Banal na Misa. Tulutan mong maialay nila ang kabuuan ng kanilang pagkatao, katawan at kaluluwa, sa pagtugon sa misyong kanilang niyakap sa diwa ng ordinasyon. Hinihiling namin ito sa pamamagitan ng Iyong matamis na pangalan. Amen

Ama namin... Aba Ginoong Maria... Luwalhati...
†††

ANG DAAN KRUS

PAMBUNGAD

P: Mga kapatid, sa lahat ng hilahil na dinaranas natin dahil na rin sa kasalanang bumabalot sa mundo: ang walang habas na paglapastangan sa dangal ng tao, ang pagkitil sa buhay maraming taong walang kalaban-laban, ang pag-abuso sa kalikasan na nauuwi sa mga kalamidad, ang paghihirap ng madaming tao sa mga hindi malunasang karamdaman, at ang kahirapang pinagdurusahan ng marami sa atin, sino pa kaya ang ating kakapitan? Sino pa kaya ang hahango sa atin?

Ang panahon ng Kwaresma ay nagbubunsod sa atin na alalahanin ang kabutinghang-loob ni Hesus, na bagama’t Diyos, ay hindi naging iba sa mga hilahil sa buhay. Siya pa nga ang unang nag-dusa, higit na una kaysa sa atin, hindi upang pagbayaran ang anumang kasalanang kanyang ginawa ngunit upang siyang maging “buhay” na kabayaran sa kasalanang niyakap ng mundo.

Halina, mga kapatid, at sama-sama nating pagnilayan ang mga pagpapakasit ni Hesus alang-alang sa ating kaligtasan. Sa diwa ng pagsisisi sa ating mga pagmamalabis sa paggawa ng masama at kakulangan sa pagtupad sa kalooban ng Diyos, sariwain natin ang kanyang pagtatampok ng dakila Niyang pag-ibig sa atin at makiisa tayo sa kanyang paglalakad sa DAAN NG KRUS.

P: Sa Ngalan ng Ama, at ng Anak, at ng Espiritu Santo
B: Amen